Daar hang ‘n vreemde Held aan daardie houtkruis

Teks: Filippense 2:7

Superman dra ‘n groot S-teken op sy bors. Wanneer hy in sy gewone klere as Clark Kent rondbeweeg en daar duik ‘n krisis op, dan ruk Superman net sy gewone klere oop om sy ware superklere en daardie groot S te wys! Hoe anders as hy is die Held van die hemel nie! Jesus het nooit tussen ons rondbeweeg in ‘n bo-aardse uniform nie. Ook was Hy nooit gewapen met spesiale hemelse wapens nie. Jesus se klere was doodgewoon. Nee, wag, dit is nie heeltemal korrek nie. Jesus se klere was die drag van arm slawe. So skryf Paulus in Filippense 2. Hy vertel in hierdie aangrypende lied vir ons dat Jesus, wat die ewebeeld van God is, gekies het om ’n slaaf te wees toe Hy na ons toe gekom het.

Jesus se vriende op aarde het swakkes, randfigure, sondaars en weerloses ingesluit. Sy wapens was wonderwerke en Sy woorde het lewe gegee vir elkeen wat dit gehoorsaam het. Ongelukkig kon party godsdienstiges dit nie vat dat Jesus so anders was as wat hulle verwag het nie. Hulle het Hom eenvoudig nie geglo nie. Daarom het hulle vir Jesus na ‘n houtkruis toe verban! Maar toe verander daardie kruis in een oomblik in die grootste reddingswapen ooit in die geskiedenis! Toe word Golgota God se finale geneesmiddel vir ons sondes, ons skaamte, ons hartseer en ons seer! Gaan kruip daar weg by Jesus. By die kruis hou Jesus juis ook vir jou plek. Daar is Hy jou redder en jou Heer.

Gebed:

Here Jesus, dankie vir die kruis. Ek skuil hier by U. Hier weet ek alles, wat skeiding maak tussen U en my maak, is afbetaal.