Soutpilaar of sout vir die aarde?

Verbeel jou jy word deur twee engele besoek! Daardie engele bied vir jou ‘n nuwe lewe aan. Jy moet egter jou bekende omgewing agterlaat en die onbekende toekoms aandurf. Diegene wat agterbly, word as gevolg van hulle bandeloosheid vernietig. 

In Genesis 18 lees ons dat God besluit het om Sodom en Gomorra te verwoes, omdat die inwoners  afvallig was. God besluit om Lot te red, omdat hy ‘n gehoorsame man was. In Genesis 19 lees ons van twee engele wat Lot besoek en by hom aandring om Sodom te verlaat. Lot waarsku ook sy vrou, twee dogters en  sy toekomstige skoonseuns om saam met hom Sodom te verlaat. 

In Genesis 19:17 lees ons die engele se waarskuwing: “Vlug vir julle lewe! Moenie êrens in die vlakte gaan stilstaan nie! En moenie omkyk nie! Vlug na die berge, anders sal julle doodgaan!” 

Ten spyte van die duidelike waarskuwing van God se naderende oordeel, ignoreer Lot se vrou die engele se waarskuwing. Sy kyk verlangend om na Sodom en verander in ‘n soutpilaar. Sy het die geleentheid gehad om die verwoesting van die stad te ontkom – die keuse was hare – maar dit was vir haar moeilik om haar gemak, al die luukshede en haar status agter te laat.  

In Lukas 17:31 en 32 praat Jesus oor Sy wederkoms en verwys weer na Lot se vrou: “Op daardie dag moet dié wat op die dakstoep sit terwyl hulle besittings nog in die huis is, nie afklim om dit saam te vat nie. Net so moet dié wat op die land is, nie terugdraai na die besittings agter hulle nie. Onthou maar net wat met die vrou van Lot gebeur het.”

Uit die verhaal van Lot se vrou leer ons dat ons elke dag moet lewe asof die Here vandag gaan terugkom. God wil nie hê dat ons gerieflik in ons gemaksone moet bly nie. Geen materiële dinge, verhoudings of verslawings mag ons terughou nie.

Na watter dinge hunker jy terug in jou ou lewe? Betrap jy jouself soms dat jy soos Lot se vrou terugkyk, ten spyte van jou goeie voornemens?

Hoe draai ‘n mens dan jou rug op die bekende ou lewe? Deur die wêreld se beloftes van gemak en oorvloed agter te le laat en God onverskrokke te gehoorsaam. Deur meer tyd in God se teenwoordigheid deur te bring om Hom beter te leer ken. God wil hê dat ons vorentoe moet kyk en op Jesus fokus.

Ons uitdaging is om sout te wees en nie ‘n soutpilaar, wat verlangend na ‘n ou lewe terugstaar nie. Wees sout deur geur by ander mense se lewens te voeg.  Wees sout deur in liefde te leef teenoor jou naaste.  Wees sout deur ander mense vir Jesus raak te leef!