Opoffer is deel van die normale Christelike lewe

Jonathan Whalon was ’n offisier aan boord van ’n walvisboot. In 1864 moes hy met plaaslike inwoners iewers op die Marquesas-eilande gaan onderhandel om vars voorrade vir hulle skip te kry. Toe hy voet aan wal sit, arresteer die stamhoof genaamd Mato hom. Hy was van mening Whalon is ’n slawehandelaar, wat sy mense wou kom vang om hulle as slawe te verkoop.

James Kekela, ’n sendeling uit Hawaii het ook op die eiland gewerk. Toe hy hiervan hoor, het hy dadelik vir Whalon se lewe gaan pleit by die stamhoof. Niks het gehelp nie totdat Kekela sy eie boot in ruil vir Whalon se lewe aangebied het. Toe aanvaar Mato hierdie ruiltransaksie.

Later het hierdie verhaal die Amerikaanse president, Abraham Lincoln, se ore bereik. Hy het Kekela met ’n spesiale horlosie om hom te bedank vir sy heldedaad vereer. Vir Kekela was dit egter die normale Christelike roete. Hy het Jesus goed geken. Hy het geweet Jesus het sy eie lewe om ons onthalwe opgeoffer. Daarom was dit nie vir Kekela te veel gevra om sy eie boot weg te gee, toe dit iemand anders se lewe kon red nie. Sulke selflose liefde is steeds die regte roete vir Jesus se mense. Ken jy dit?