• Stephan Joubert

“Nee” is ’n sin


In hierdie uitgawe van Stephan Joubert se midweek Goeie Nuus, skryf hy oor hoe ons soms "nee" moet sê in plaas van "ja".
“Nee” is ’n sin
“‘No’ is a complete sentence,”

skryf iemand. Wel, dit is … net soos die woord “ja.” Maar ons sê baie gouer “ja” as “nee”. Dit is hoekom dinge soms skeefloop. Ons wil nie mense se gevoelens seermaak nie, daarom sê ons maar “ja” as hulle verkeerde of oorhaastige besluite neem. Ons laat kinders te veel vryhede en dinge toe want as ons “nee” sê, dan hou hulle dalk nie meer so baie van ons nie. “Nee” is egter ’n noodsaaklike woord in ons woordeskat. Die Here gebruik dit wanneer dit die slag nodig is; ons moet ook. Hy sê “nee”, want Hy weet wat die beste is vir ons. Hy weet dat ’n oorhaastige “ja" ons lewe kan laat ontspoor. Daarom is daar baie kere ‘n “nee” in die Bybel. Of ’n “moenie.” Dit beteken nie God het ons nie lief nie. Dis juis die teendeel. Presies omdat Hy ons liefhet, keer Hy dat ons verdwaal en afdwaal. Kom ons leer hierdie woord, hierdie volledige sin, ook weer aan. Ons moet dit egter spaarsamig gebruik. Ons moet dit gebruik om ander mense, en onsself, op die Here se roete te hou.