Leer om kritiek te weeg - moenie dit tel nie

Verbitterde ongelowiges en geharde godsdienstiges het heelwat in gemeen. Beide groepe het altyd ’n gemeenskaplike vyand. Beide groepe gebruik dieselfde tipe taktiek, al doen hulle dit vanuit verskillende ideologiese invalshoeke. Geharde nie-gelowiges sowel as onbuigsame godsdienstiges hou daarvan om diegene, met wie hulle verskil, op liefdelose maniere te tipeer as dom, oningelig, konserwatief of liberaal.

As jyself dalk al onder sulke geharde nie-gelowiges en godsdienstiges deurgeloop het, is dit nie noodwendig ’n slegte ding nie. As jy al beledig is of selfs verwyt is dat jy die duiwel in lewende lywe is, dan staan jy reg uit vir jou geloof. Jesus het juis gesê dat as hulle Hom Beëlsebul genoem het, dan sal dieselfde lot Sy volgelinge ook tref. Geen dissipel van Jesus mag ooit so akkommoderend wees dat mense geen kennis neem van dit wat ons sê en doen nie. Hanteer dus kritiek, wanneer dit die slag nodig is. Moenie moeilikheid soek nie - dit het jou naam en adres - maar hanteer dit reg as dit opdaag. Onthou altyd om alle vorms van kritiek te weeg en nie te tel nie. Moenie van ontsteltenis wakker lê wanneer gehate godsdienstiges en nie-godsdienstige boelies op jou hakke is nie. Onthou, sulke mense kort eintlik net ’n dosis goeie maniere en jyself kort meer slaap. Moet jou nie ontstel oor skelms en skurke nie, soos wat Psalm 37 jou leer. Leef net tot eer van die Heer.