Tregter-ervaring: hoe hanteer ek ‘n krisis?

Soos menige Afrikaner het Brink ook drome gedroom oor boerdery – om ‘n plaas te mag hê en met die aarde, met die plaasdiere besig te kon wees. So het die dag ook aangebreek waarop Brink en ‘n vriend ‘n stuk grond én ‘n klompie beeste gekoop het. Een van sy hoogtepunte was om die diere in die drukgang in te jaag sodat hulle bespuit kon word met dipstof en ook die gereelde inentings kon kry. Wanneer so ‘n koei in die drukgang is, is daar natuurlik nie omkeer nie – sy móét eenvoudig vorentoe, hoe onaangenaam die ervaring ook al mag wees.

Ek kan my goed indink hoe dit moet voel om in ‘n drukgang te beland, of erger nog, 'n tregter – om soos in ‘n sci-fi fliek binne-in ‘n stroom te wees wat deur ‘n enorme tregter gekanaliseer word. En daar is nie omdraai- of uitkomkans nie! Dis net hier waar ek na God begin roep om hulp, verkieslik hulp om uit hierdie tregter te kom.

“Let go and let God” impliseer egter dat ek maar my greep op die rand van die tregter sal los en God sal vertrou dat daar weer verligting/ruimte kom ná die tregter-ervaring.

Hy het belowe Hy sal in tye van voor- én teëspoed by my wees – wanneer ek deur die vuur moet gaan, of deur diep water. Deur die maer en vet jare is Hy steeds my God. Hy sal my nie verlaat of in die steek laat nie. (Hebreërs 13:5-6)

As ek vertroue kon hê in my en Brink se instrukteur terwyl ek ons 14 meter motorboot in ‘n storm deur die Teems monding moes stuur, moet ek tog vertroue hê in my hemelse stuurman om my veilig deur ‘n finansiële storm of ‘n huwelikskrisis te help. Maar ek voel tog soms dat Hy van my vergeet het en dan raak ek angstig soos die dissipels wat besef Jesus lê en slaap terwyl hulle boot in ‘n storm vasgevang is.

“Let go and let God” beteken dat ek Hom sal vertrou om by my te wees deur hierdie drukgang, hierdie tregter-ervaring, en my veilig anderkant uit te bring.