"En nou is dit nie meer ek wat lewe nie, maar Christus wat in my lewe" (Galasiers 2:20).

Vir jare het ek die Bybel gelees totdat ek eendag hierdie vers baie stadig gelees het.  Ek het die IN omkring om die gedagte uit te lig dat Christus waarlik IN my as mens LEWE!  Dit is 'n oneindige groot ontdekking as dit tot jou deurdring.

Andrew Murray stel dit so treffend in sy boek, "Die hartklop van God": "In hierdie woorde druk Paulus drie groot gedagtes uit:

Eerstens: ek is met Christus gekruisig.  Toe Christus aan die kruis gesterf het, het Hy al God se kinders in DIE dood laat deel.  Soos wat ons almal in Adam gesterf en sy sondige natuur geerf het, is ons ook almal saam met Christus gekruisig. Die krag van sy dood werk elke dag in ons. Soos Christus het ons vir die sonde gesterf, en moet voortaan vir God lewe. Ons vereenselwiging met die gekruisigde Christus is daarom van die grootste belang.

Paulus se tweede gedagte is dat hy wel leef, en tog is dit ook nie meer hy wat leef nie.  Omdat hy aan die dood van Christus deel gehad het, kon hy met oortuiging se dat hy nie meer lewe nie. Sy lewe is oorgegee aan die dood aan die kruis.  So sien ek ook deur die geloof myself vrygestel van die doodsvonnis wat op my gerus het.

Die derde gedagte is dat Christus in hom wat Paulus is woon.  DIT is die groot geheim van 'n lewe soos wat Christus gelei het. Christus is nie alleen vir my gekruisig nie, Hy tree nie alleen vir my in nie, maar Hy woon ook in my. Soos wat sy Vader in Hom gewoon en gewerk het, woon en werk Christus in ons."

Hierdie is lewendmakende woorde! Ek kan alleen Christus se inwoning in myself ervaar as ek dood is vir die wereld en die eie ek. Laat ons God toelaat om elke dag sy wil in ons laat geskied. Ons kan verseker weet dat ons volkome aan God verbind is deur die Heilige Gees wat in ons werk. Mag die Heilige Gees ons gedrag voortdurend bepaal en in elke keuse en besluit van ons teenwoordig wees. Mag ons in hierdie Kerstyd, toelaat dat Christus weer opnuut in ons harte gebore word!  Seenwense.

BRON: Murray,A. Die hartklop van God. Lux Verbi.BM, Wellington. 2003.