Berei die weg?

Mat 3:3 & :5&6 "Want dit is hy van wie deur die profeet Jesaja gespreek is toe hy gesê het: Die stem van een wat roep in die woestyn: Berei die weg van die Here, maak sy paaie reguit! En Jerusalem en die hele Judéa en die hele omtrek van die Jordaan het uitgegaan na hom toe. En hulle is deur hom in die Jordaan gedoop met belydenis van hulle sondes."

Baie lank voor Jesus se geboorte het Jesaja al in Jes 40:3 geprofeteer van Johannes die Doper se lewe. Hy het geprofeteer dat Johannes die weg vir die koms van Jesus sou voorberei. En hoe doen Johannes dit? Hy preek en sê vir die mense dat hulle hul moet bekeer en dan doop hy hulle. Dit is amper asof ’n mens wil sê hoe berei jy die weg vir die Here voor deur mense te doop?

Dan lees ons in Joh 1:31 wat Johannes die Doper self gesê het nl. “En ek het Hom nie geken nie; maar dat Hy aan Israel openbaar sou word, daarom het ek gekom en met water gedoop.” Die NKJ vertaling sê “... that He should be revealed to Israel, therefore I came baptizing with water.”

Wat hier gebeur is die begin van ‘n radikale verandering in die geloofslewe van God se volk. God het geweet dat die volk nie sommer ’n man wat tussen hulle as mens rondloop sou aanvaar as die Seun van God nie. Daarom het Hy lank tevore deur Sy profete laat opteken dat die Messias gebore sou word en daar is geprofeteer oor baie aspekte van Sy lewe asook Sy sterwe. Dit alles sodat as die Messias sou kom, Sy volk Hom sou herken vir wie Hy is.

Maar dit lyk my die feit dat niemand geweet het presies wanneer dit sou gebeur nie het genoodsaak dat daar nog iets nodig was om op die spesifieke tyd die mense se oë oop te maak sodat hulle vir Jesus sou herken as die Een oor wie daar geprofeteer is. Daarom moes Johannes die Doper kom. Hy het gepreek en gesê dat die Koninkryk van God het naby gekom, waarskynlik bedoelende iets soos: “Let op die Messias is nou hier.”

“... I came baptizing ... that He should be revealed to Israel ...” laat blyk dat die doop nodig was om die mense se geestelike oë oop te maak sodat hulle Jesus inderdaad kon herken as die Een oor wie daar geprofeteer is.

Die doop van Johannes die Doper was die begin van die bediening van die doop. Daarna lees ons in Joh 4:1&2 (“Toe die Here dan verneem dat die Fariseërs gehoor het dat Jesus meer dissipels maak en doop as Johannes— alhoewel Jesus self nie gedoop het nie, maar sy dissipels—“) van mense wat gedoop is terwyl Jesus op aarde was en ons weet dat die bediening van die doop na Jesus se hemelvaart voortgegaan het tot vandag toe.

Maar volgens Mat 3:7&8 blyk dit dat Johannes die Doper die Fariseërs en die Sadduseërs nie wou doop nie en hulle aangesê het om hulle eers te bekeer. (“Maar toe hy baie van die Fariseërs en Sadduseërs na sy doop sien kom, sê hy vir hulle: Addergeslag, wie het julle aangewys om te vlug vir die toorn wat aan kom is? Dra dan vrugte wat by die bekering pas.”) Dit was egter juis hulle wat Jesus laat kruisig het. Kan dit wees dat hulle Hom nie herken het vir wie Hy werklik was nie, omdat hulle hul nie bekeer en laat doop het nie? Dat hulle geestelike oë nie oop was om Hom te herken vir wie Hy werklik was nie? Maar Petrus het geweet wie Jesus werklik is toe hy in Mat 16:16 gesê het "U is die Christus, die Seun van die lewende God."

Laat ons seker maak ons ken die Seun van wie Johannes die Doper in Joh 3:36 praat as hy sê “Hy wat in die Seun glo, het die ewige lewe; maar hy wat die Seun ongehoorsaam is, sal die lewe nie sien nie, maar die toorn van God bly op hom.” en wat in Joh 14:6 van Homself praat as Hy sê “Ek is die weg en die waarheid en die lewe; niemand kom na die Vader behalwe deur My nie.”

Voeg Kommentaar By

Jy moet 'n lid wees van Ekerk om kommentaar te lewer!

Join Ekerk

Kommentaar deur Theo Stehle op 16 November 2010 om 18:41: Dankie David, dit was vir my 'n groot seen. Ek vereenselwig my volkome daarmee. Die profetiese betekenis van die wegbereider vir Jesus se eerste koms, Johannes die Doper, is nie gering nie. Die profesiee omtrent die wegbereiding vir Jesus is egter nie beperk tot Johannes die Doper as die fisieke wegbereider vir die Jesus wat in die gestalte van 'n mens gekom het nie, maar daar is ook die geestelike wegbereider vir die tweede koms, die wederkoms van Jesus in die Gees, wat voor die deur is. Dit is die verskuilde betekenis wat daar in Jesus se woorde was na sy verheerliking op die berg, toe Hy vir sy dissipels gese het op antwoord van hul vraag: "Waarom se die skrifgeleerdes dan dat Elia eers moet kom?": "Elia moet waarlik eers kom en alles herstel, maar Ek se vir julle dat Elia reeds gekom het..." Toe het die dissipels verstaan dat Hy met hulle oor Johannes die Doper gepraat het (Matt. 17:10-13).

Waarom hierdie teenstrydigheid, dat Elia nog moet kom, maar hy het reeds gekom? Daar is 'n uitleg daarvoor. Ons vind dit in die OT sowel as die NT, maar dis verborge, nie voor die hand liggend nie. Daar moet eers 'n herstel kom. Wie is die teenvoeter vir Elia , d.w.s. Johannes die Doper met Jesus se koms in die vlees? Wat kom eerste, vlees of gees? Vlees. (1 Kor. 15:46) As Jesus in die vlees gekom het by sy eerste koms, hoe kom Hy weer met sy tweede koms? In die Gees natuurlik. En as Johannes die Doper die wegbereider was vir Jesus in die vlees, hoe sal die wegbereider, die Elia, wees met sy wederkoms? In die Gees natuurlik. D.w.s. daar sal 'n wegbereiding wees deur die Heilige Gees, deur 'n kragtige uitstorting op die gemeente, die wat dit verwag en daarvoor gereed is. Lees Hosea 6: 1-3 - "Hy sal tot ons kom soos die laat reen - tipe van die uitstorting van die HG. Lees ook daarmee saam Hand. 3:21. Daar is nog baie ander profetiese skrifte wat hierdie verder uitlig en bevestig, maar ek volstaan hiermee.

Tragies dat met Jesus se geboorte daar net twee mense in die hele volk van God, die Jode, was, wat Hom verwag en herken het as die Messias: Anna en Simeon. Hoe is dit moontlik dat God net aan hierdie twee mense openbaring gegee het oor die Messias? Dit was nie God se wil of plan nie, maar die Jode wat hul harte hiervoor toegesluit het sodat hulle dit nie kon ontvang nie. My vraag is: Hoeveel gelowiges (die volk van God onder die Nuwe Verbond) het 'n verwagting van die wederkoms van Christus, hoeveel is op die Here se golflengte ingestel en gereed om Hom te ontvang, nie volgens ons opinies of voorstelling van hoe dit gaan wees nie, maar soewerein volgens Sy plan en Sy wil?

Die Heilige Gees gee ons in hierdie dae, die eindtyd, openbaring oor die betekenisse van die profetiese skrifte wat op die 2de koms, die wederkoms betrekking het. maar soos jy tereg se: Dis verborge vir diegene wie nie in verhouding is met God deur bekering, wedergeboorte, doop, ontvangs van die gawe van die HG en gehoorsame wandel met God nie. Die Heilige Gees sal ook nie vir ons waarheid openbaar as ons nie 'n begeerte het daarna nie. Ons het ook eers nodig om uit te kom uit die beklemming van onskriftuurlike godsdienstige strukture en helaas, dis waaraan so baie dierbare gelowiges, wat God liefhet, aan vasklou, sodat God hulle nie verder kan neem op die pad wat Hy vir elkeen bedoel het, naamlik om na die volmaaktheid voort te gaan.

Kommentaar deur David Malherbe op 16 November 2010 om 12:43: Lettie, hierdie blog gaan nie oor groot of klein doop nie, maar net oor hoe ek verstaan Johannes die Doper die weg vir Jesus voorberei het. Oor groot of klein doop glo ek moet elkeen self die saak met die Here uitmaak. Soos wat die Heilige Gees (en nie mense nie) oortuig van sonde, geregtigheid en oordeel (Joh 16:8) glo ek oortuig Hy ook tov die doop. My ondervinding is dat die Here lei deur ons vrede te gee oor 'n saak. As jy vrede het oor watter doop ook al, dien die Here met jou hele hart en siel en verstand en met al jou kragte, (Mar 12:30&33) daar waar jy is.

Kommentaar deur Lettie Jacobs op 16 November 2010 om 11:20: David is die klein doop dan verkeerd? Al is ek 'n bekeerde, verdoem die klein doop my? Vra maar net.

RSS

Welkom by
Ekerk

Registreer
of Teken In

Or sign in with:

Ontvang gratis Ekerk se epos

Jy kan ook hier kliek om te registreer om die daaglikse artikels in jou epos inboks te ontvang, soos wat hulle op ekerk verskyn.

Videos

In die voetspore van Jesus - 03 Redder

Opgelaai deur Paul Hugo
In die voetspore van Jesus - 02 Geneesheer

Opgelaai deur Paul Hugo

Boodskap van Stephan

Kliek hier om 'n welkom video vanaf Stephan Joubert te kyk, of kliek op enige van die sosiale netwerke hieronder om met ekerk op ander platforms te skakel!